مش بعد ما كسرنا حاجز الخوف بتحلموا ترجعوه تاني، مش بعد ما اتحدينا خوفنا من أمن الدولة في عز جبروته، مش بعد ما فتحنا صدرنا للرصاص لاجل نهتف للحرية مش بعد ما شفت اخويا بيموت جنبي اي شهيد مات في الثورة دي بعتبره ضحى بروحه عشاني خاد الرصاصة بدالي.. طب مات ليه؟!! مات علشان انا اعيش حر علشان كرامتي ترجعلي.. مات وهو مطمن ان أهله دول هشيلهم في عينيا ومفيش حد هيقدر يمس شعرة منهم.. عايزني اخونهم النهارده، عايزني اخونهم ودمهم لسه سخن واللي قتلهم واقف بيضحك ورا قفص في محاكمة بيحكم فيها نفس القاضي اللي كان هيحبسني لو فشلت الثورة، والنائب العام اللي بيوجهلهم التهم هو نفسه اللي كان هيوجهلي تهم التحريض على قلب نظام الحكم والتآمر على مصلحة الوطن وتنفيذ مخطط دول أجنبية عدوه، بس دي كانت ثورة يا عسكر ونجحت بفضل الرجالة اللي وقفوا 16 ساعة يحموا الميدان من البلطجية يوم موقعة الجمل، 16 ساعة وانتوا بتتفرجوا عليهم بيموتوا وساكتين وتقول انا محايد.. لا لامؤاخذة اسمها معرص مش محايد وقلت انا اللي حميت الثورة وسكتنالك طب عايزين ايه!؟واحد قال كلمة حق على انتهاكات المجلس في الأول تاخده تحقق معاه وتهدده وتقول قرصة ودن خفيفة كده. ودلوقتي وصلتوها لمحاكمات رجعنا تاني نقول أسير الكلمة.. وعن ممارسات المجلس العسكري الأخيرة بتوسيع حملة الاعتقالات، وتحويل المدنيين إلي محاكمات عسكرية، فتم القبض منذ شهر فبراير الماضي على حوالى 12000 شخص، تمت إدانة البعض منهم ويقضون الآن أحكاما بالسجن لعدة سنوات. 12000 دي محصلتش ولا في عهد عبدالناصر ولا السادات ولا مبارك نفسه 12000 مواطن في 6 شهور!! وعايزنا نسكت ونقف نتفرج!؟
احنا مش بنفاصل في الحرية والكرامة, ثورة كاملة ياإما بلاش.. كفاية يامجلس صبرنا ليه حدود
أم الشهيد اتضربت والجامع ودنستوه وضربتوا الصايمين في أول يوم شهر كريم.. ده غير ضباط 8 ابريل، ده غير تخوين حركة 6 ابريل، ده غير الشباب اللي زي الورد اللي بيضيع مستقبلهم وبيتاخدوا مننا واحد ورا التاني مش ناسينهم ولا ناسيين الميدان يوم 9 مارس و9 ابريل، ومش ناسيين لما كشفتوا على عذرية البنات.. إنما للصبر حدود يامجلس
فرحتوا بفرقتنا لكن انا مؤمن ويمكرون ويمكر الله والله خير الماكرين.. مبروك علينا اللي حصل في أسماء محفوظ فوق ناس كتير وقعتوا في شر أعمالكم، هنتوحد تاني وهنعلي الصوت ومش هيهمنا دباباتكوا ومدرعاتكوا هنهتف كلنا تحت العلم اللي بيجمعنا هنهتف ضد ظلمك وبطشك.. هنحمي ثورتنا وافتكروا يا عسكر ان مبارك ماسبش الحكم بمزاجه.. والمحاكمات العسكرية هتقف غصبا عنكم مش برضاكم.. موعدنا يوم الجمعة 9 سبتمبر.. جمعة كل مصري شريف.. لا للمحاكمات العسكرية للمدنيين.. يسقط يسقط حكم العسكر
